MundoGaliza

Escribía, fai tempo, no momentaneamente desaparecido xornal dixital VIEIROS, sobre o absurdo da presencia da nosa lingua nai no Senatum do Estado. O próximo día 18 de xaneiro, será a primeira sesión na que as linguas cooficiais, poidan empregarse na chamada cámara baixa. Entendo que se un é acérrimo defensor da utilización exclusiva da lingua galega na cámara do Hórreo, non é lóxico que pretenda a súa utilización nunha institución situada na capital do Estado, e na que o idioma castelán pode ser perfectamente a única, polo seu total coñecemento e utilización por parte dos ociosos senadores.

Se engadimos que o custe de cada sesión por mor das linguas propias de Catalunya, Euskadi e Galicia, ascende a 12.000 euros, concordarán vostedes comigo no absurdo dunha medida máis efectista que necesaria. O Senado é ben certo que é unha cámara de representación interterritorial, mais a realidade fala da súa necesaria desaparición por inútil e ineficaz, nun entorno de crise que debería levarse por diante tamén ás anacrónicas Deputacións, e a unha morea de pequenos Concellos, necesitados dunha racional fusión, antes que a crise a force á “grega”. Non é funcional nin razoable a estructura administrativa da Galicia do 2011.

Na cámara galega existen recoñecibles deputados, próximos ás teses da Mephistopheles bífida, que como Fausto venderon a súa alma, na busca de rendementos persoais, e sempre con actitude cando menos sospeitosa contra a lingua de Rosalía. A súa teima utilizando o castelán no Parlamento do país, non é máis que provocación e menosprezo, disfrazado de presunta liberdade. Os antigalegos que moran no partido no que máis militantes falan e aman a nosa lingua, están xa na “fase dúas” da súa acción cara o rendemento cuantitativo, nos sustractos máis acomplexados da nosas cidades cara as eleccións municipais de Maio. Mais o que non é razoable, é esixir para nós o dereito e deber da utilización do galego, e dende a non coherencia, facelo tamén na Vila e Corte.

Na Galicia destes días, na que os ceos decidiron que as augas asulaguen a nosa terra, caen outro tipo de “diluvios” moito máis perigosos, cuxo efecto noso futuro como pobo, non hai prado nin leira que o drene, polo efecto bífido que está a producir no noso ecosistema.

Ou non?

RAFAEL CUIÑA