MundoGaliza - Aguirre e Gallardón toman posicións

Aguirre e Gallardón toman posicións

Redacción MundoGaliza | Domingo, 03 de Xuño do 2007 | Estatal

E se perde Rajoy perde as xerais? A derrota é unha posibilidade moi real aínda que no PP andan moi crecidos tralas municipais.

Os dirixentes do PP traballan xa nun plan B.

Obviamente, o plan A é o da vitoria, mais segundo todos os dirixentes consultados do PP, só Esperanza Aguirre e Alberto Ruiz-Gallardón, os dous líderes madrileños, están en condicións de aspirar á praza de presidencia. Substituirán a Rajoy?

Membros da máxima dirección e de ambos sectores coinciden en que Gallardón conta con apoios moi importantes como o do andaluz Javier Arenas, o catalán Josep Piqué ou o galego Alberto Núñez Feijóo. Máis dubidosos, situaríanse o valenciano Camps ou o balear Matas.

Fronte a eles, e máis próximos a Aguirre, situaríanse Castela-A Mancha, Murcia, A Rioxa, Castela e León, o País Vasco, Estremadura, Canarias, Asturias e, obviamente, Madrid.

Os respaldos rexionais implican delegados para un congreso nacional. Formalmente, debería ser en outubro, pero a maioría dos dirixentes empeza a apostar abertamente por atrasalo até logo das eleccións.

A chave de todo está na decisión de Rajoy de colocar ou non a Gallardón na lista ao Congreso por Madrid, non necesariamente de número dous. Aí decídese todo, porque estar na Cámara baixa significa poder aspirar á sucesión se hai derrota.

Aguirre, mentres tanto, move as súas pezas para impedir que Gallardón chegue ao Congreso. Iso daríalle a el un plus, porque podería compaxinar, como fixo o socialista Francisco Vázquez durante anos, a alcaldía e o escano. Ela, como presidenta autonómica, non podería. Tería que demitir, algo impensable porque perdería o seu poder.

Nesa batalla por lograr un posto no Congreso, Gallardón podería contar, segundo fontes da dirección, cun apoio inesperado: o do propio Aznar, que deixaría vía libre á alcaldía para Ana Botella, a muller do presidente de honra do PP.

Produciráse unha sucesión tralas eleccións?

Se os inquéritos non lles son favorables substituírán a Rajoy?

Se cambian líder perderán ou gañarán máis votos?

Comentarios (1)