 |
O presidente do PP, Mariano Rajoy, ve intranscendente que os nenos galegos aprendan o himno autonómico, unha idea que, como a posibilidade de cambiar o uso horario na Galiza, "non lle importa a ninguén", e asegurou que o transcendente para eles é que aprendan inglés ou que se familiaricen coas novas tecnoloxías. |
O dirixente popular respondía así ao interese do vicepresidente da Xunta, Anxo Quintana, por aproveitar o ano do centenario da primeira interpretación do himno para que non haxa ningún neno en Galicia "que non coñeza e saiba cantar os versos do bardo de Bergantiños".
"Eu creo que o máis importante en Galicia é que os nenos estuden inglés desde os tres anos, que se familiaricen coa sociedade da información e as novas tecnoloxías desde a idade máis temperá, que saiban moitas ciencias, moitas matemáticas e que teñan un modelo educativo esixente, porque se non, estarémolos a enganar", manifestou Mariano Rajoy.
"Aquí falouse de poñer os nomes das lápidas en galego, falouse do cambio de hora... Todo iso non lle importa a ninguén", resolveu o dirixente popular.
Non lle importará a ninguén que non sexa galego, non lle importará a Rajoy e non lle importará a un desleigado coma el.
Acaso a ignorancia e o auto-odio que parece carcomelo por dentro lle impide ver que non é incompatible o coñecemento do inglés ou francés, alemán ou calquera outra lingua - incluso o salvaguardado e benquerido español - co galego?
Acaso as novas tecnoloxías obnubilan tanto a mente de Mariano que non ve máis aló dos seus fuciños e non entende que un cativo que saiba prender un computador pode ter a sensibilidade de ler, saber e cantar o himno da súa patria, da súa terra... ?
Primará logo as ciencias e tecnoloxías por riba das humanidades?
Quere nenos que teñan pensamento crítico, coñecementos e raciocinio ou quere autómatas de mente estreita como a súa ademais dunha masa submisa á que controlar?
Non será enganar aos nenos roubarlle a súa identidade?
Todos os coñecementos son necesarios para a formación dun neno, empezando pola súa lingua nai.
Son tan necesarias unhas nocións de filosofía, historia, arte, linguas... como unhas matemáticas ou unha tecnoloxía... e iso sen esquencer nunca que hai que aprender valores, porque de nada me servirá ter un máster se non teño humildade, humanidade, civismo e respecto polos demais.
E pasando da educación ao máis alá, a Mariano non lle importará que na súa lápida apareza un epitafio en galego - igual si lle importaría e se levantaría a sacalo - mais hai a moita xente que ao mellor lle gustaría incluír nas súas derradeiras vontades levar un epitafio na súa lingua e ter a liberdade de poder facelo.
Ninguén impón, salvo o español.
Comentarios () |
|
|
|
|
|
:'(
