Máis de 5.000 persoas, unhas 2.000 segundo a Policía Local e 10.000 segundo os convocantes, manifestáronse en Ferrol convocados polo Comité Cidadán de Emerxencia da Ría de Ferrol para pedir ás administracións competentes que Reganosa non sexa autorizada de forma definitiva, xa que a planta de Mugardos opera en fase de probas desde o pasado 9 de maio.

Baixo o lema 'Non á autorización, planta de gas fóra da ría', os manifestantes partiron do peirao de Curuxeiras do porto de Ferrol ás 12.15 horas e finalizaron a protesta na praza de Armas, ante o Concello de Ferrol, sobre as 13.30 horas.

Na manifestación reclamaron ao Goberno central que non se conceda a Acta de funcionamento definitivo á regasificadora, porque o Comité asegura que non se cumpren as condicións establecidas na Autorización Administrativa Previa de 2002: a distancia legal á poboación, segundo a Directiva Deveso II; e a saída ao mar dos gaseiros en caso de emerxencia (norma EN-1532), xa que os buques cargados só poden navegar con seguridade pola ría con preamar.

A instalación, que xa recibiu a descarga de sete buques gaseiros, dispón dunha Acta de Posta en Servizo Parcial ou probas desde maio prorrogada o pasado 8 de agosto, nunhas medidas que os manifestantes cualificaron de "fraude de lei" e "argucia legal".

Así mesmo, os veciños do núcleo de Mehá (Mugardos), pechados desde hai 69 días no concello da localidade, para reclamar que a planta de gas non sexa autorizada definitivamente preguntaron publicamente "en caso dunha catástrofe, quen será o responsable?".

A mobilización contou co apoio de colectivos cidadáns de toda Galiza. Destacou a presenza de representantes de Izquierda Unida-Esquerda Unida, que goberna en coalición co PSOE en Ferrol, membros de CC.OO., CIG e USTG. Na protesta participou, así mesmo, o ex-voceiro nacional do BNG Xosé Manuel Beiras. En declaracións aos medios de comunicación, asegurou que "Reganosa é unha arbitrariedade absoluta que conculca a legalidade máis elemental, que pon en perigo aos cidadáns, e que significa un sometemento do poder político elixido polos cidadáns aos intereses do capital privado".

Así, Beiras criticou a situación actual de Reganosa por "irracional e auténtica barbarie", e censurou que os poderes políticos se "preguen" aos "caprichos dos intereses do capital". Asegurou que a "única saída digna" é a situación de Reganosa no porto exterior, pero lamentou que Caneliñas non dispoña aínda de accesos. Achacou esta situación ao porto exterior da Coruña, que cualificou de "atrocidade", "saco sen fondo", e "escándalo aínda superior ao da Cidade da Cultura".

Comentarios (0)

Escribir comentario

Nome

Comentario

Novo Comentario

Compartir: