 |
Non nos vaiamos enganar, enganar á galega por non trabucarnos, que de enganarnos á galega e máis á española xa xoga o aspirante a todo e a nada don Mariano. O parlamento español non sofre de autoodio, apenas o seu capitán, capitán do autoodio verquendo por esa lingua zarabiperina na contra do pobo que o veu nacer. |
O presidente do goberno Español, que demostra máis sensibilidade e ningún autoodio (xa que sempre tivo a gala a súa orixe), deulle toda unha lección ao descastado de Rajoy "É incríble que o presidente do Goberno, que é de León, teña máis sensibilidade cara o galego que o líder da opisición, que é da Galiza", espetoulle a un Mariano falto de argumentos.
Zapatero viña de se comprometer co deputado do BNG, Franciaco Rodríguez, a estudar a posibilidade de que os galegos puideramos ver, a través da Televisión Dixital, as canles de televisión portuguesas, como fórmula para potenciar o vínculo cultural e lingüístico entre a Galiza e Portugal.
Unha moi boa iniciativa e que non supón, acho, ningún trauma para Mariano... salvo que agora non entenda o galego que se fala nen dunha nen doutra marxe do Miño.
E xa o home como non sabía por onde estoupar, contou unha das súas marianadas mentireiras no parlamento, marianada que parecía máis sacada dagunha desas organizacionciñas antigalegas que dun parlamentario que quere presentarse á presidencia dun goberno.
Sexamos serios Mariano, pensas que alguén che vai crer que o español está perseguido na Galiza? Acaso haberá alguén que poida demostrar que non hai colexio en todo o país que non dea unha soa aula en español?
Deixa de criticar no congreso que Zapatero estea máis preocupado de que os galegos poidamos ver a televisión en portugués que de defender o castelán na educación galega.
A min dame televisión en portugués e en calquera outra lingua, que o saber non ocupa lugar, e deixa de defender o indefendible que a verdade sempre acaba por saír á luz... igual que os teus "hilillos de plastilina" que seguen a pulular polo mar.
Comentarios () |
|
|
|
|
|
