O voceiro nacional do BNG, Anxo Quintana, fixo no acto de inicio de campaña electoral un chamamento aos electores para que "voten como galegos", co duplo obxectivo de "frear ao PP" e de que Galiza deixe de ser "actor secundario" e "decida" no Estado español.

Para o tamén vicepresidente da Xunta, isto "só" será posible se o BNG é "decisivo" nas Cortes e a comunidade galega "está representada en pé de igualdade con Euskadi e Cataluña". Nese senso, augurou que o "grande cambio" que se producirá o 9-M "non ten nada que ver coas carreiras presidencialistas de Zapatero e Rajoy" senón que "virá dado da man do BNG porque poderá decidir en Madrid".

Neste senso, resaltou que a formación frentista é a mellor opción ante as propostas do "señor Catástrofe -Mariano Rajoy- e do señor Medo -José Luis Rodríguez Zapatero-". Sobre o líder 'popular' ironizó con que anunciou "doce veces que rompía España, outras doce que rompía a familia". "E sobre a catástrofe económica xa perdín a conta", dixo.

En canto ao actual presidente do Goberno, reprobouno por "ter un só argumento, o medo á dereita". "Nin a catástrofe nin o medo, se abre un novo tempo no que Galiza vai ser protagonista", augurou.

O cabeza de lista do BNG pola provincia da Coruña, Francisco Jorquera, mostrouse convencido de que o resultado do 9-M será "un avance do BNG e un retroceso do PP". "Ese avance do BNG vai obrigar ao Partido Popular a rectificar os seus ataques contra o noso idioma, contra a nosa cultura, e a modificar o seu rexeitamento ao novo Estatuto de Nación para Galiza", afirmou.

Durante o discurso de Jorquera produciuse a maior ovación da noite, cando se referiu ao falecemento do histórico dirixente nacionalista Luís Obelleiro, que morreu onte vítima dun cancro. Así, parafraseou un verso de Uxío Novoneyra -'A forza do noso amor non pode ser inútil'- para concluír que "a forza do seu amor á Galiza non vai ser inútil" nas próximas eleccións xerais.

Comentarios (0)

Escribir comentario

Nome

Comentario

Novo Comentario

Compartir: