Esta semana foi especialmente conflictiva en canto a atropelos nas rúas da cidade. Cinco sinistros deste tipo entre o luns e o venres, tres deles con peóns feridos de carácter grave. Case poderiamos dicir que a responsabilidade destes sucesos divídese a partes iguais entre peóns e condutores. Con todo, os datos son desalentadores xa que na Coruña prodúcese un atropelo diario.

Aínda que o concelleiro de Tráfico, Florencio Cardador, aposta pola educación vial e a sensibilización de condutores e peóns, a efectos prácticos o seu departamento ten previsto acometer de forma paulatina a iluminación de todos os pasos de cebra da cidade.

Pese a que hai varios meses que Cardador mostrou o seu interese por levar a cabo esta iniciativa, non foi posible até o de agora debido a que as cuestións referentes ao alumeado público dependen da Concellaría de Infraestruturas.

Unha vez salvado este obstáculo, as primeiras probas para a instalación do novo sistema arrincarán a semana que vén, segundo explicou o concelleiro. Os ensaios realizaranse na avenida do Exército e, de forma escalonada, cando se probe a súa eficacia, a actuación estenderase a aqueles pasos de peóns máis conflictivos.

Polo momento, o Concello descarta a posibilidade de multar a aqueles peóns que incumpran as normas viarias, como xa se fai noutras localidades.

Compartir:

Comentarios (0)

Escribir comentario

Nome

Comentario

Escribe os carácteres da imaxe

Novo Comentario