Faktoría K presenta unha nova iniciativa editorial, 'Trece Lúas', que consiste na edición de dúas seleccións poéticas de Rosalía de Castro e Celso Emilio Ferreiro con ilustracións de Belén Padrón e Baldo Ramos, respectivamente, con motivo do Día Mundial da Poesía.

Os libros, que conteñen 13 poemas cada un, contan con páxinas despregables que crean unha "poesía visual" para ler "pausadamente" e para "contemplar pracidamente" sobre un atril, "deixando que os versos e as imaxes das Trece Lúas inunden o espírito do lector", segundo explicou a editorial.

A presentación destas seleccións terá lugar o próximo martes, día 25, en Libraría Couceiro de Santiago. No acto tamén estarán presentes a presidenta da Fundación Rosalía de Castro, Helena Villar; o crítico literario e especialista na obra de Celso Emilio Ferreiro, Ramón Nicolás, e o artista Baldo Ramos.

En canto ás ilustracións, Belén Padrón dá "forma e cor" a cada poema de Rosalía de Castro, á vez que plasma a súa propia visión do imaxinario 'rosaliniano'. Deste xeito, preséntanse ante o lector-espectador imaxes de contido onírico e simbólico sobre o desamor, a morriña, a beleza da paisaxe, a vida dos galegos, as inxustizas sociais, a saudade e o desasosego interior.

Por outra parte, Baldo Ramos, natural de Celanova ao igual que Celso Emilio Ferreiro, presenta unha sucesión de imaxes de estilo surrealista e con formato caligráfico, xunto cunha mestura cromática na que contrastan negro, branco, vermello, amarelo, lila e granate para ilustrar os poemas do escritor.

Comentarios (0)

Escribir comentario

Nome

Comentario

Novo Comentario

Compartir: