Os veciños do barrio coruñés de Novo Mesoiro, nunha reunión coa concelleira de Servizos Sociais do Concello da Coruña, Silvia Longueira, solicitan que lles entregue un documento asinado ante notario no que se comprometa a non realoxar aos xitanos de Penamoa na súa zona.

O conflito comezou hai dúas semanas, cando os veciños de Novo Mesoiro aseguraron ter visto actas da Consellaría de Vivenda nas que figuraba a adxudicación de pisos de vivenda de protección pública situados en Mesoiro a familias xitanas do poboado de Penamoa, un feito ao que se opoñen "radicalmente".

Este "rumor", levou a arredor de 300 veciños a manifestarse de xeito practicamente diario e a provocar cortes de tráfico de até 60 minutos de duración en hora punta nos principais accesos á cidade, así como na zona centro.

Os veciños aseguran "non ser racistas" e xustifican a súa oposición asegurando que a chegada dos habitantes de Penamoa suporía a creación de focos de droga e a presenza de drogadictos que acudirían ao barrio a comprar as devanditas substancias. De momento, continuarán co seu calendario de mobilizacións, segundo o que se manifestarán mañá martes desde a praza da Palloza até María Pita, a partir das 20.00 horas.

Compartir:

Comentarios (0)

Escribir comentario

Nome

Comentario

Escribe os carácteres da imaxe

Novo Comentario