A Consellaría de Cultura crea os 'Premios Nacionais da Cultura Galega' con dez categorías dotadas cada unha con 15.000 euros. Un xurado, integrado por 15 membros do mundo da cultura da Galiza, fallará en xuño a partir das candidaturas que se formulen no prazo dun mes a partir de hoxe.

Estes galardóns, que nacen con vocación de continuidade, abertos á participación e como recoñecemento "global" da cultura que se fai na Galiza, concederanse nas categorías de 'Arquitectura e Espazos Públicos', 'Artes Visuais', 'Artes Escénicas', 'Literatura', 'Música', 'Patrimonio Cultural', 'Pensamento e Cultura Científica', 'Cinema e Audiovisual', 'Iniciativa Cultural' e 'Cultura Tradicional e de Base.

A convocatoria aparece publicada hoxe no Diario Oficial de Galicia (DOG), tal e como explicou o director xeral de Creación e Difusión Cultural, Luis Bará, quen dixo que con esta iniciativa responde a "unha vella demanda" e a "un anhelo" do mundo da cultura na comunidade e que fai que Galiza "se equipare a outras nacións" á hora de "recoñecer" ás persoas ou colectivos que destaquen no enriquecemento da cultura galega.

A conselleira de Cultura, Ánxela Bugallo, recoñeceu que "esperan moito destes premios" que, resaltou, se conciben como a "ferramenta adecuada para facer máis visible o traballo en favor da cultura galega e o seu dinamismo" e como "un paso máis no proceso de normalización da cultura galega".

O xurado, presidido pola conselleira de Cultura, estará integrado nesta edición, ademais de por Xosé Ramón Barreiro, por María Xosé Agra Romero, catedrática de Filosofía Moral e Política de USC; Ramón Villares Paz, catedrático de Historia Contemporánea da USC e presidente do consello da Cultura Galega; Rosario Álvarez Blanco, catedrática de Filoloxía Galega e directora do Instituto da Lingua Galega; Xosé Luis Barreiro Rivas, profesor e director do Departamento de Ciencias Políticas da USC; e Xosé Manuel Buxán Bran, profesor de Escultura na Facultade de Belas Artes da Universidade de Vigo (UDV).

Tamén son membros do tribunal encargado de elixir aos galardoados María Bouzas, actriz e presidenta da Academia Galega do Audiovisual; Domingo Docampo Amoedo, catedrático do Departamento de Teoría do Sinal e Comunicacións da UDV; Laura Tato Fontaíña, profesora de Filoloxía e Humanidades da Universidade da Coruña (UDC); María Isabel Fraga Vila, directora do Museo de Historia Natural Luis Iglesias da USC; Celestino García Braña, arquitecto e decano do Colexio de Arquitectos de Galicia; Ana Romaní Blanco, escritora, directora do Diario Cultural da Radio Galega; John Rutherford, tradutor, escritor e profesor do Queen's College da Universidade de Oxford; Felipe Senén López Gómez, museólogo e xestor cultural da Deputación da Coruña; e Xurxo Souto, músico e escritor, director de programas da Radio Galega.

Comentarios (0)

Escribir comentario

Nome

Comentario

Novo Comentario

Compartir: