O Servizo de Normalización Lingüística e a Vicerrectoría de Cultura da Universidade de Santiago (USC) promoveron a elaboración de 17 guías que permitirán "revisar, avaliar e ser moi transparentes" na oferta docente aos estudantes, así como abrir un espazo de crítica conxunta e contribuír ao uso do galego.

Así o destacou na presentación das guías o vicerrector de Cultura, Elías Torres, quen considerou que o resultado acadado "enriquece os níveis de calidade da USC", ao tempo que "acredita unha mellor consecución" dos obxectivos da universidade como institución docente.

A USC promoveu o desenvolvemento do I Curso de elaboración de Unidades Didácticas, referidas a 17 materias impartidas polos docentes que participaron no curso. Os documentos servirán de material de traballo tanto para os alumnos coma para o profesorado.

Este primeiro curso estaba dirixido exclusivamente a profesores universitarios e persoal docente en formación, co obxectivo xeral de contribuír ao uso do galego unido á mellora metodolóxica na docencia.

Pola súa banda, o decano da Facultade de Ciencias da Educación, Lois Ferradas, coincidiu coa profesora Concha Losada ao apostar porque o traballo presentado supoña o inicio dun novo camiño a favor do idioma e da reivindicación da calidade na docencia que redunde tanto nos profesores da USC, coma nos seus alumnos.

Comentarios (0)

Escribir comentario

Nome

Comentario

Novo Comentario

Compartir: