O presidente do estaleiro Hijos de J. Barreiras, José Francisco González Viñas, recibiu a medalla de Vigo de mans do alcalde da cidade, Abel Caballero, polo "seu labor industrial acorde co cambio dos tempos". No mesmo acto, que serviu para conmemorar a Reconquista, tamén se fixo entrega de títulos de Vigueses distinguidos de 2008 a un total de sete entidades e persoas destacadas polo seu labor a favor da urbe nos seus distintos ámbitos de actuación.

A celebración, que comezou ás 20.00 horas no Centro Cultural Caixanova, contou coa asistencia dunha nutrida representación dos axentes sociais, económicos e políticos da cidade. Así, ademais dos membros da Corporación Municipal, formada polos partidos PSdeG, BNG e PP, tamén asistiu a presidenta do Parlamento galego, a viguesa Dores Villarino.

As persoas e colectivos que recibiron o galardón de Vigués distinguido foron a Confraría do Cristo de la Victoria, a Asociación de Amigos da Ópera de Vigo, a Asociación de Antigos Alumnos do colexio María Auxiliadora (Salesianos), a xogadora de baloncesto en cadeira de rodas María Victoria Alonso, o xornal A Nosa Terra, o Colexio Oficial de Enxeñeiros Técnicos Industriais e a Asociación de Corais Polifónicas da cidade.

A Medalla da cidade concedeuse este ano na factoría naval de Barreiras, fundada en 1892 e á que o Concello fixo un recoñecemento do seu "labor industrial acorde co cambio dos tempos" e por ser unha industria "punteira" ademais dunha grande "fonte de postos de traballo".

Comentarios (0)

Escribir comentario

Nome

Comentario

Novo Comentario

Compartir: