O representante da sección da Mar da FGAMT-CIG, Xabier Aboi, presentou, acompañado polo procurador da central sindical, unha ‘querela criminal por homicidio imprudente e contra os dereitos dos traballadores’, no xulgado nº 2 de Instrución de Ferrol, onde se están a instruír as dilixencias previas nº 269/2008, do afundimento do barco “Cordero”, o día 15 de xaneiro de 2008 na costa ferrolá.

Tras da presentación da querela, Aboi salientou que esta “vai contra os responsábeis políticos e non contra os traballadores”, matizando que a CIG recoñece o labor tanto daqueles que van nas lanchas como nos helicópteros e que arriscan de forma constante a súa vida nos labores de rescate.

Para o representante de CIG-Mar é imprescindíbel que se depuren responsabilidades políticas “por respecto aos mortos e aos vivos”. Por iso, entre os imputados figuran altos cargos do Ministerio de Fomento, como o Director Xeral da Mariña Mercante, o Subdirector Xeral de Seguridade Marítima e Contaminación, o Subdirector Xeral de Calidade e Normalización de Buques e Equipos, a Directora Xeral da Sociedade de Salvamento e Seguridade Marítima, o secretario Xeral de Transportes, o Director de Operación de SASEMAR, o Director do Centro Nacional de Coordinación de Salvamento Marítimo, o Presidente do Consello de Administración da empresa HELICSA Helicópteros, S.A. e o Presidente do consello de Administración da empresa Remolques Marítimos S.A.

A CIG non descarta que a medida que se instrúe o caso se vaia ampliando a lista de imputados “por non ter adoptado, a pesar de estar legalmente obrigados, as medidas tendentes a evitar o resultado que finalmente se produciu: a morte e a posta en grave risco da vida dos mariñeiros do barco ‘Cordero’”, tal e como está previsto no artigo 318 do Código Penal.

Compartir:

Comentarios (0)

Escribir comentario

Nome

Comentario

Escribe os carácteres da imaxe

Novo Comentario