 |
O ex-parlamentario e único eurodeputado que logrou o BNG, Camilo Nogueira, advertiu á dirección do Bloque de que emprendeu un "camiño potencialmente destrutivo" ao decidir converterse nunha formación de apoio a un dos partidos "dominantes", tanto na Galiza coma no Estado.
"Hoxe é o PSdeG -lembrou- mais quizais mañá será o PP, se este cambia de política", augurou.
|
"O BNG ten que ser consciente de que a deriva tomada hai varios anos debe finalizar", así o aconsella nun documento presentado onte no Consello Nacional do BNG. Nogueira na última asemblea do Bloque tomou a decisión de impulsar unha candidatura alternativa para disputar ao voceiro nacional do Bloque, Anxo Quintana, a súa presidencia.
Precisamente, a reunión do consello Nacional tiña como obxectivo avaliar os resultados das eleccións xerais, onde o BNG concluíu que se cumpriron os obxectivos, ao incrementar o apoio electoral nunha situación sen maiorías absolutas e ao lograr un "papel decisivo" no ámbito do Estado.
Esta interpretación dos resultados confirma, para Camilo Nogueira, a tendencia "acomodaticia e subordinada que define a actuación presente da organización". Así, reprobou que se valore dese xeito un resultado electoral "practicamente idéntico" ao conseguido en 2004, cando o BNG sufriu "unha forte caída, perdendo votos e un deputado".
Unha análise que "oculta", ao seu entender, "o carácter actual da sociedade galega, máis preparada que nunca para emprender un proceso de autodeterminación".
Por iso, acusou ao BNG de "afastarse sistematicamente" dos movementos sociais e atribuíuno a que a dirección "non fai nada" para integrar no movemento nacional ás capas sociais profesionais, tanto novas como maiores, dunha sociedade galega, hoxe urbana e industrial na súa aplastante maioría, "formando un todo co mundo agrario e co pesqueiro".
Nogueira considerou que a propia elaboración das últimas listas electorais reflicten estas "carencias decisivas" e atribuíu os votantes do BNG a que "unha parte considerable" se mantén pola "fidelidade a Galiza como nación", a pesar de que "non concordan con coa orientación desnortada que tomou a organización".
Comentarios () |
|
|
|
|
|
