O Centro Ramón Piñeiro presentou na parroquia de Moscoso, na localidade pontevedresa de Pazos de Borbén, a recompilación 'Fraseoloxía de Moscoso e outros materiais de tradición oral', que conta con 2.618 refráns, 667 cantigas e 71 contos. Ademais, tamén aparece algún material fraseolóxico, como ditos ou 'comparacións' (locucións) e 'pragas' (fórmulas de maldición).

A edición deste documento foi realizada a partir de 16 manuscritos de José Augusto Ventín Durán, depositados nos arquivos da Real Academia Galega (RAG), dentro do fondo doado polo escritor Fermín Bouza Brey.

Segundo indicou a Secretaría Xeral de Política Lingüística, Ventín recolleu un "importante" conxunto de materiais fraseolóxicos e de tradición oral que aspiraba a situar nun contexto internacional, posto que detectou "semellanzas e contrastes" con materiais similares do portugués. Ademais, el foi o primeiro etnolingüista galego que coñeceu en vivo os corpus portugués e brasileiro tralas súas estanzas no país sudamericano.

Logo da finalización da presentación da obra, realizarase unha ofrenda floral en honra a Ventín no cemiterio de Moscoso, á que asistirán tanto a secretaria xeral de Política Lingüística, Marisol López; como o presidente da RAG, Xosé Ramón Barreiro.

Comentarios (0)

Escribir comentario

Nome

Comentario

Novo Comentario

Compartir: