O candidato socialista á Presidencia do Goberno, José Luís Rodríguez Zapatero, non logrou sumar este mediodía ningún voto aos 168 apoios emitidos polos deputados presentes do PSOE, co que non puido ser investido na primeira votación no Congreso, na que se requería maioría absoluta (176 votos).

Na votación celebrada hoxe no Pleno do Congreso, Zapatero só logrou o apoio dos 168 deputados presentes do Grupo Socialista --faltou a canaria Mercés Coello, con problemas para viaxar a Madrid polo temporal--, mentres que o PP, Esquerra Republicana e Rosa Díez (Unión, Progreso e Democracia) votaron en contra, sumando 158 'nons'.

Houbo 23 abstencións entre CIU, PNV, Esquerda Unida, BNG, Coalición Canaria (CC), Iniciativa per Catalunya (ICV) e Nafarroa Bai.

Non houbo opción a erros, xa que a votación foi pública e por chamamento, o que supón que os 350 deputados foron poñéndose en pé un a un para anunciar o seu voto de viva voz. Un sorteo determinou que a votación arrincase co deputado de IU, Gaspar Llamazares, que proclamou a súa abstención.

Ao non conseguir a maioría absoluta no primeiro intento, a votación repetirase 48 horas despois, ou sexa o vindeiro venres ao mediodía. Aí bastará con contar con máis votos a favor que en contra.

É a segunda vez na recente historia democrática de España que se necesita unha segunda volta para ser investido o presidente do Goberno. O precedente é Leopoldo Calvo Sotelo, de Unión de Centro Democrático (UCD), que en 1981 asumiu as rendas do Executivo trala demisión de Adolfo Suárez. Aquela votación, un 23 de febreiro, pasou á historia porque esa tarde foi cando se produciu a intentona golpista de Antonio Tejero.

Agardemos que desta vez non haxa máis incidencia que a normal investidura de José Luis Rodríguez Zapatero como presidente de todos os españois. 

Compartir:

Comentarios (0)

Escribir comentario

Nome

Comentario

Escribe os carácteres da imaxe

Novo Comentario