O ex-delegado do Goberno na Comunidade de Madrid, o galego Constantino Méndez, que dimitiu do seu cargo en maio de 2006 trala primeira sentenza xudicial sobre o denominado caso Bono, será nomeado secretario de Estado de Defensa no primeiro Consello de Ministros do novo Gabinete presidido por José Luis Rodríguez Zapatero, reunido de forma extraordinaria este luns no Pazo da Moncloa.

Méndez podería tomar posesión hoxe, martes pola mañá, e esta mesma semana pechará previsiblemente o equipo que o acompañará na Secretaría de Estado de Defensa, en cuxa estrutura se integran a maioría das diferentes direccións xerais do Ministerio de Defensa.

A Secretaría de Estado de Defensa ocúpase dalgunhas das máis importantes competencias do Departamento que dende hoxe dirixe Carme Chacón, entre outras as relacionadas cos grandes programas de armamento e material das Forzas Armadas e é o órgano encargado de dialogar cos grupos parlamentares cando se aborda a elaboración de novas leis e decretos, entre outras cuestións.

Nacido en 1953 en Pontecesures (Pontevedra), Méndez foi nomeado delegado do Goberno na Comunidad de Madrid en abril de 2004 e dimitiu do seu cargo o 8 de maio de 2006, tras coñecer a primeira sentenza xudicial que condenou a tres policías polas detencións de dous militantes do PP na manifestación da AVT celebrada o 22 de xaneiro de 2005.

A sentenza en cuestión, ditada pola Audiencia Provincial de Madrid, condenou tres membros do Corpo Nacional de Policía polo arresto dos militantes do PP de Madrid e foi revogada posteriormente polo Tribunal Supremo. Méndez xustificou a súa saída por "responsabilidade" e por manter a "defensa da profesionalidade dos corpos e forzas de seguridade do Estado".

Compartir:

Comentarios (0)

Escribir comentario

Nome

Comentario

Escribe os carácteres da imaxe

Novo Comentario