 |
Esta mañá presentouse en Santiago a edición 2008 do Correlingua, unha actividade que se celebra de xeito regular desde o 2000, consistente en diferentes carreiras a prol do galego que se celebran en 13 vilas de Galiza, e na que se prevé unha participación de preto de 40.000 rapaces e rapazas procedentes da maioría de centros educativos de todo o país. |
No acto, celebrado no Auditorio de Galiza, tamén se entregaron os premios dos concursos de Manifesto e de Banda deseñada do Correlingua 2008, que recaeron no grupo de 3º Eso do CPI Vicente Otero Valcárcel de Carral, e no grupo de 5º de primaria do CP Pepe de Xan Baña de Santa Comba, respectivamente, tendo acordado o xurado mencións especiais para o grupo de 1º de Bacharelato do IES Xermán Ancochea da Pobra de Trives e o IES Río Miño de Rábade na sección de Manifesto e para o grupo de infantil de 4 anos do CPI Afonso VII de Caldas de Reis, e o grupo de 5º de Primaria do CEIP A Cristina de Carballo, en Banda deseñada.
Compre resaltar que foron máis de 500 centros os participantes nestes concursos, que teñen como premio a participación nos programas Vive o Monte e Entremareas da Dirección Xeral de Xuventude da Vicepresidencia, e no Proxecto Terra organizado polo Colexio de Arquitectos e movementos de renovación pedagógica como a AS-PG. A grande calidade dos manifesto e Bandas deseñandas apresentadas, motivaron o recoñecemento especial aos finalistas por parte do xurado.
Correlingua é a denominación que adoptaron de maneira común as diversas carreiras en prol do idioma que se convocan no país. É unha proposta de carácter lúdico-educativo que pretende convidar a mocidade e os centros de ensino a participar nun acto público de reivindicación do dereito a medrar en galego e tamén a exercer de maneira efectiva como galegos e galegas a través do uso do noso idioma, única forma de garantir o seu futuro.
'En Galego Cabe Todo' foi o lema escollido para a presente edición, facendo referencia á capacidade das memorias dos Mp3 e I-pods, onde todo o que se faga en galego ten cabida e, por tanto, trasladando que na nosa vida diaria, en todas as nosas actividades o noso idioma pode estar presente.
Na presente edición do Correlingua incorporouse o A Polo Ghit do Correlingua en colaboración coa Radio Galega e Vieiros. O Ghit do Correlingua 2008 buscouse entre 51 grupos de música galega, que o alumnado tivo a oportunidade de descargar da páxina web do Correlingua e votar. Resultou elexido o grupo Sínefres de Boiro, que actuará en 8 das festas finais do Correlingua. En outras 5 festas actuará o Xabarín Club da TVG. En todas as vilas e cidades nas que se celebra o Correlingua, desenvolveranse espectáculos teatrais que contarán coa participación de Touriñán e Marcos, de Ppablo e os Ghazafellos, ou do Grupo Chévere, entre outros.
Próximamente editarase o segundo número da revista Correlingua que contará coa participación de alumnos e alumnas de diferentes centros de ensino do País, e onde se publicarán os traballos gañadores do Concursos da edición 2008.
No acto celebrado esta mañá participaron, por parte das entidades organizadoras, Anxo Louzao e Marta da Costa, de CIG-Ensino, Carlos Callón e Fran Rei, por parte da Mesa pola Normalización Lingüística e a súa sección xuvenil, respectivamente; Olga Patiño, da AS-PG, e Guadalupe Rodríguez, concelleira de Educación e Normalización Lingüística de Santiago. Tamén estivo presente Luis Bará Torres, director xeral de Creación e Difusión Cultural, e Xurxo Souto, xefe de programas da Radio Galega.
O presidente da Mesa, Carlos Callón, animou aos rapaces e rapazas a seguir empregando a súa lingua en todos os eidos, e recordou que toda a sociedade en xeral está chamada a participar na manifestación nacional que, baixo o lema “Polo dereito a vivirmos en galego”, convoca a asociación en defensa da lingua para o vindeiro 18 de maio en Santiago de Compostela.
CALENDARIO CORRELINGUA
A Coruña 06/05/2008 A Coruña
A Barbanza 07/05/2008 Ribeira
Ferrolterra 07/05/2008 Ferrol
A Mariña 08/05/2008 Foz
Salnés 08/05/2008 Vilagarcía
Lugo 09/05/2008 Lugo
Santiago de Compostela 12/05/2008 Santiago de Compostela
Pontevedra 13/05/2008 Pontevedra
Vigo 14/05/2008 Vigo
Baixo Miño 15/05/2008 Salceda de Caselas
Ribeira Sacra 15/05/2008 Monforte de Lemos
Monterrei 16/05/2008 Verín
Ourense 16/05/2008 Ourense
Comentarios () |
|
|
|
|
|
que fuerte non hay ningunha foto nosa ahi!
