| O Concello crea o primeiro mapa lumínico |
|
|
| Redacción MundoGaliza | Martes, 22 de Abril do 2008 | A Coruña | |||
Trátase dun estudo "moi pormenorizado" que supón un traballo de campo, no que os técnicos tiveron que establecer os tipos de rúas e zonas de toda a cidade, ademais de sinalar os 95 modelos diferentes de luminarias que existen e rexistralos coas súas respectivas características para contar cun inventario actualizado que facilitará o seu tratamento no futuro. Segundo os datos que recolle o estudo, a cidade conta cunha superficie iluminada de 5 millóns de metros cadrados e 17.054 puntos de luz, cunha potencia total de 3.657 kw. EFICIENCIA ENERXÉTICA. A Coruña conta cunha eficiencia enerxética "notable", pois duplica os valores medios establecidos: fronte aos 17 metros cadrados lux/w, a cidade ten nas súas rúas unha media de 29,25 metros cadrados lux/w. A primeira fase do Mapa Lumínico desenvolveuse nos distritos un e dous da cidade, que comprende os barrios da Cidade Vella, Peixaría, Monte Alto e Adormideras. Segundo o estudo, a calidade da iluminación pública nestas zonas é boa, aínda que, atendendo a criterios de sustentabilidade e eficiencia enerxética, se recomenda continuar o programa municipal de substitución de lámpadas de mercurio por outras de sodio, así como a instalación de sistemas de redución da iluminación en tramos horarios. SUSTENTABILIDADE. Estes datos, recollidos no mapa lumínico, presentaranse o xoves, día 24, nunhas Xornadas de Enerxía Sustentable e Loita contra o Cambio Climático, dentro do Proxecto Europeo Practise, organizadas polo Concello no Paraninfo da Universidade da Coruña. O proxecto Practise ten carácter internacional e persegue o desenvolvemento da enerxía sustentable a nível local no marco da Unión Europea. Na España só participa a cidade herculina, mais a nível europeo conta co apoio de varias institucións de Italia, Franza, Gran Bretaña e Romanía.
Compartir:         |
|||
| < Ant. | Seg. > |
|---|
