A Universidade de Vigo puxo en marcha unha campaña informativa para explicar as vantaxes do plurilingüismo na educación e, no marco desta iniciativa, profesores de sociolingüística da entidade académica ofrecerán charlas divulgativas en centros de ensino primario e secundario, para docentes, para asociacións de pais e nais, ou para estudantes.

A iniciativa conta co apoio dos Concellos de Vigo, Ourense e Pontevedra, ademais das outras universidades galegas (Santiago de Compostela e A Coruña), e está "aberto a máis adhesións". De feito, municipios como o de Nigrán, Tomiño, Redondela ou Moaña, xa manifestaron o seu interese por sumarse a esta campaña, que está presente na web, a través da páxina webs.uvigo.es/plurilinguismo

O responsable de Normalización Lingüística da Universidade de Vigo, Henrique Costas, explicou que esta acción informativa persegue poñer en evidencia a importancia de que os estudantes sexan "competentes" en varias linguas, xa que "todo o que sexa educación en varias linguas supón vantaxes para o escolar".

Así mesmo, explicou que as medidas implantadas até o de agora para favorecer o bilingüismo harmónico "se revelaron como un fracaso", xa que só se converteron en estudante bilingües aqueles que xa falaban galego no seu ámbito habitual.

De feito, só entre o 30 e o 35 por cento de alumnos da Universidade de Vigo usan o galego sempre nos seus estudos, mentres que, no caso da docencia, a cifra non supera o 15 por cento. Segundo Costas, o uso do galego por parte dos profesores universitarios está condicionado polo feito de que, ao contrario que noutros níveis educativos, non se lles esixe esta ferramenta para poder dar clase.

Comentarios (0)

Escribir comentario

Nome

Comentario

Novo Comentario

Compartir: