| O cabo Chao denuncia presións da Armada |
|
|
| Redacción MundoGaliza | Sábado, 26 de Abril do 2008 | Estatal | |||
O cabo relatou que o xoves se presentou voluntariamente ante o Tribunal Médico Pericial para elaborar un informe previo das súas aptitudes psicolóxicas e físicas, e que o comandante Peña Albarracín, psiquiatra da Armada, recibiuno "con desprezo, advertíndolle de que sería prexudicial para a súa saúde se seguía saíndo en prensa e desoíndo as queixas e explicacións". Ante o xuíz recordou que xa o mesmo día do accidente, o comandante Víctor Porta Pereira, recomendou aos membros da fragata que "non falasen do tema do sucedido a bordo baixo ningún concepto nin coa familia nin coa prensa", xa que son militares e teríanse que ater ás consecuencias. Os argumentos foron reiterados polo cabo ante o xuíz, na comparecencia que se enmarca nas dilixencias previas que se instrúen sobre o accidente da fragata Extremadura, o 18 de decembro de 2005, no que morreron dous mariños, Eric Noval e Francisco Javier Pérez Castrillón, nunha explosión nas caldeiras. O cabo declarou que desapareceron documentos que demostrarían que os altos cargos ao mando da fragata coñecían, e foran alertados, da situación de perigo que se rexistraba na caldeira. O cabo Jorge Miguel Gago Chao, despois de 14 anos de servizo e cinco medallas -dous ao mérito naval, unha da Unión Europea e dúas entregadas pola OTAN- tamén denunciou ante o xuíz que permaneceu ano e medio sen destino na Armada, a pesar de formular 10 opcións diferentes.
Finalmente foi destinado forzosamente a Rota e "esquecido administrativamente na súa carreira militar", segundo as súas propias palabras. Sofre ansiedade e depresión, como consecuencia dos feitos acontecidos na Fragata Extremadura, e reclama á Armada que lle compense as secuelas psicolóxicas que aquel accidente lle provocou. Compartir:         |
|||
| < Ant. | Seg. > |
|---|
