O conselleiro de Traballo, Ricardo Varela, avanzou que Galiza e o Norte de Portugal colaborarán entre 2009 e 2010 nun proxecto europeo dotado cun financiamento próximo ao millón de euros para fortalecer a competitividade das empresas en ambos os dous territorios da eurorrexión e reforzar a calidade do emprego transfronteirizo.

No proxecto, que forma parte do Programa Europeo de Cooperación transfronteiriza España-Norte de Portugal 2009-2010, participarán tamén a Federación Galega de Municipios e Provincias e a delegación Norte do Instituto de Emprego e Formación de Portugal.

A reunión no concello ourensano de Leiro, á que tamén asistiron representantes de organizacións sindicais e empresariais, pretende deseñar un plan de actuación conxunta para reprimir as infraccións laborais e mellorar a coordinación da vixilancia e control dos dous países, xa que existe unha bolsa indeterminada de man de obra portuguesa que vén á comunidade galega sen que se producira a obrigada comunicación sobre desprazamentos de traballadores transfronteirizos.

Respecto ás denuncias de organizacións sindicais que alertaron de que os operarios portugueses sofren unha situación de discriminación, o responsable autonómico de Traballo asegurou que se aplicará a máxima de "tolerancia cero" con calquera tipo de práctica que vulnere os dereitos dos traballadores e, "sexan de onde sexan", que desenvolvan o seu traballo na Galiza.

Da reunión sairá unha planificación con actuacións cuantificadas e visitas conxuntas dos equipos de inspección da Galiza e Portugal en cada unha das provincias galegas. Ademais, realizarase un seguimento das medidas de prevención de riscos nas obras de infraestruturas con man de obra transfronteiriza para intensificar -"máis aínda se cabe", dixo Varela- o Plan de Actuación de Grandes Obras que se desenvolve dende 2007.

Compartir:

Comentarios (0)

Escribir comentario

Nome

Comentario

Escribe os carácteres da imaxe

Novo Comentario