|
|
| O 28,7 por cento dos galegos asegura que, de convocarse agora eleccións autonómicas, votaría ao PSdeG, fronte ao 22,2 por cento que votaría ao PP e o 15,8 por cento que daría o seu respaldo ao BNG, segundo o estudo "Clima Social da Galiza" do primeiro trimestre de ano, presentado polo secretario xeral de Análise e Proxección, José Manuel Rivera Otero. |
"Non quere dicir que o PSOE gañe as próximas eleccións", explicou o alto cargo da Xunta, que recordou que estes datos expresan intención directa de voto, non estimación, que si poderá realizar cada formación xa que o seu departamento lles enviou o estudo a cada grupo parlamentar.
Respecto ao último Clima Social, presentado o pasado mes de outubro, hai un incremento en intención de voto das tres principais formacións autonómicas, xa que o PP sobe máis de cinco puntos, o PSdeG o fai case na mesma medida e o BNG rexistra un aumento de dous puntos.
En canto aos líderes políticos, o presidente da Xunta e secretario xeral do PSdeG, Emilio Pérez Touriño, segue sendo o máis valorado polos galegos cun nota de 5,7, seguido polo voceiro do BNG e vicepresidente do Executivo, Anxo Quintana, que sobe do aprobado raspado a un 5,23.
Continúa pechando o grupo o presidente do PPdeG, Alberto Núñez Feijóo, que sobe a súa valoración a 4,45 puntos e tamén aumenta a súa porcentaxe de coñecemento ata o 93,3 por cento, o que "o deixa nunha situación de competición perfectamente definida", segundo Rivera Otero.
O secretario xeral destacou especialmente a "valoración moi, moi, moi alta" que fan os galegos da xestión da Xunta, xa que case un 59 por cento a aproba, cinco puntos máis que hai seis meses, malia que o 48,3 por cento di estar pouco informado sobre as actividades que desenvolve o Goberno autonómico.
Pois o clima, social ou non, ándache ben revolto así que non vos fiar moito do que vos asegura o estudo. Quen sabe!
Aínda que, polo momento, parece confirmarse que o PSdG saca bo rendemento da xestión das consellarías bloqueiras.
Comentarios () |
|
|
|
|
|
