Un total de 5.000 mozos participarán hoxe no Correlingua deste ano, que partirá da Coruña e percorrerá toda Galiza até finalizar en Ourense o día 16 deste mesmo mes. Tal e como explicou a responsable de Normalización Lingüística do Concello da Coruña, Ermidas Valencia, trátase dunha proposta "lúdico educativa, unha carreira a favor da lingua que se desenvolverá en todas as cidades galegas" para estudantes de secundaria e bacharelato, "xusto a idade na que deixan de usar o galego".

O premio para os gañadores será un MP4 programable en galego "unha forma de achegar o idioma a través das novas tecnoloxías", pois segundo explicou, é "moi difícil" atopar un aparato de última xeración ou unha videoconsola que conte coa opción de galego entre os seus idiomas.

A concelleiro de Cultura, María Xosé Bravo, remarcou o duplo obxectivo "lúdico e reivindicativo" da carreira, por un lado "unha festa cultural" e por outro un acto "que sirva para que a xuventude use o galego en todos os contextos". Para acompañar os participantes, o Concello achegará un grupo de capoeira, música, bailes e actuacións.

Despois da Coruña, mañá celebrarase en Ferrol, o 8 en Foz e Vilagarcía, o 9 en Lugo, o 12 en Santiago, o 13 en Pontevedra, o 14 en Vigo, o 15 en Salceda de Caselas e Monforte e, finalmente, rematará o 16 de maio en Verín e Ourense.

Compartir:

Comentarios (0)

Escribir comentario

Nome

Comentario

Escribe os carácteres da imaxe

Novo Comentario