 |
O BNG de Vigo aprobou a expulsión do presidente da Asociación Galega de Amizade con Israel (AGAI), Pedro Gómez-Valadés, e xustificou esta medida en que foi "desleal" á organización. Este militante ten agora a posibilidade de recorrer ante distintos órganos de dirección da formación frentista.
A Federación de Comunidades Xudeas emitiu un comunicado no que acusa ao BNG de "intolerancia, intransixencia e fascismo mental".
|
Así o confirmou a responsable comarcal do Bloque na cidade olívica, Manuela Rodríguez, que comentou que na reunión de onte se votou a favor de expulsar a Gómez-Valadés. Deste xeito, o consello comarcal avalou un informe elaborado por un relatorio creado para estudar o caso e que, ao seu xuízo, proba os feitos polos que se lle abriu un expediente disciplinario.
Manuela Rodríguez recalcou que o motivo para tomar esta decisión é o "comportamento desleal" do presidente da AGAI, e rexeitou as causas que el esgrime ante os medios, unha suposta actitude "fascista" do BNG pola súa militancia proisraelí. Así mesmo, censurou que "saque fóra da organización cuestións internas" e apuntou que o deber da dirección é garantir que se cumpran os estatutos.
Gómez-Valadés conta agora coa posibilidade de recorrer ante distintas instancias da dirección nacionalista. En primeiro lugar ante a asemblea comarcal, que se celebrará a vindeira semana e, se se ratifica a súa expulsión, pode acudir á comisión de garantías e ao Consello Nacional, máximo órgano entre asembleas.
O presidente da AGAI xa avanzou que esgotará todas as canles para esixir unha rectificación. No caso de que finalmente se confirme a súa saída obrigada da formación frentista, levará o conflito á xustiza ordinaria, xa que considera que se violarían os seus dereitos fundamentais.
A Federación de Comunidades Xudeas emitiu un comunicado no que "deplora" a decisión do Bloque, ao que acusou de "intolerancia e intransixencia" e reprochoulle o seu "fascismo mental". De feito, asegurou que Gómez-Valadés sufriu durante un ano "o distanciamento, a frialdade e o mobbing dos seus compañeiros".
Comentarios () |
|
|
|
|
|
