|
Diñeiro público para a COPE |
|
|
|
Redacción MundoGaliza
|
Sábado, 10 de Maio do 2008 |
Estatal
|
 |
A emisión do programa de radio de Federico Jiménez Losantos desde Canarias, no que o entrevistado foi o socialista Jerónimo Saavedra, actual alcalde das Palmas, provocou malestar entre os militantes socialistas, malestar que comparte o presidente do Cabildo de Gran Canaria, o socialista José Miguel Pérez, cuxa administración aportou, sen que el o soubera, 12.000 euros para costear os gastos do evento. |
Trátase dun acordo que asinou de forma unilateral o conselleiro de Turismo, Novas Tecnoloxías e Comercio Exterior do Cabildo, Roberto Moreno, cos responsables da COPE e co fin de promocionar o turismo na illa. Pérez cuestionou que o citado espazo de Losantos tivese algo que ver coa promoción turística.
O presidente do Cabildo asegurou que se decatou da presenza do xornalista Losantos a través dos medios de comunicación e engadiu que non o invitou a asistir ao seu programa, aínda que estaba “moi contento” de que non o fixera.
Fontes próximas ao Conselleiro de Turismo aseguraron que se asinan contratos de promoción turística coa COPE do mesmo xeito que se fai con outros medios como a SER, RNE ou calquera televisión.
José Miguel Pérez substituíu a José Manuel Soria á fronte do Cabildo en xullo de 2007, tralas eleccións autonómicas. Durante o mandato do PP, si se discriminou a determinados medios como a SER e o periódico Canarias Ahora, críticos co seu Goberno, que estaban vetados e non recibían publicidade institucional. Pola contra, medios como a COPE ou El Mundo e outros, si se beneficiaron de forma habitual das campañas institucionais do Cabildo.
Outra mostra do favoritismo pepeiro cara aos seus é a creación do Foro Literario Vargas Llosa, ao que o Cabildo de Soria aportou 200.000 euros e, segundo as facturas aportadas, xustificáronse 140.000.
Comentarios () |
|
|
|
|
|
