Na semana previa á celebración do Día das Letras, A Mesa pola Normalización Lingüística comeza unha campaña para conseguir adiantos para o uso do galego no Servizo Galego de Saúde (SERGAS). A entidade en defensa da lingua de Galiza indica que falar e recibir atención en galego nos servizos sanitarios é un dereito básico que debe ser garantido e, por iso, exixe medidas por parte da Consellaría de Sanidade e do Presidente da Xunta. Así mesmo, coloca esta reivindicación entre as que estarán presentes na mobilización nacional que se celebrará en Compostela o vindeiro 18 de maio baixo o lema “Polo dereito a vivirmos en galego”.

Para A Mesa, “malia que a xestión e funcionamento das diferentes instalacións sanitarias galegas foi transferida xa hai anos á Xunta de Galiza, que creou o SERGAS, un simple paseo por calquera centro de saúde ou complexo hospitalario de calquera das nosas vilas ou cidades fainos pensar que realmente a rede sanitaria pública depende de Madrid, Castela ou Andalucía”.

A organización explica que, aínda que hai unha parte da sinalización estándar e dos formularios que si están en galego, os escritos e avisos do día a día dos centros exclúen “de xeito aplastante” a lingua propia de Galiza. O galego tamén está “maioritariamente excluído” na atención ao público, tanto presencial como telefónica. Para A Mesa, “a gravidade deste incumprimento é maior se temos presente que a maior parte da poboación galega que acude ao SERGAS é galego falante”.

Tales vulneracións foron denunciadas pola Mesa perante o Consello de Europa, pois o SERGAS “conculca ostensibelmente o estipulado pola Carta Europea das Linguas Rexionais ou Minoritarias”. Por iso, a entidade cívica pediulle ao organismo europeo que inste ao SERGAS a dotarse dun plan de galeguización, no cal debe ter especial importancia un proxecto de formación lingüística para o seu persoal.

A campaña da Mesa, enmarcada dentro dos actos previos á manifestación do domingo 18 de maio, consistirá principalmente na difusión polos principais centros da rede do SERGAS dun modelo de escrito para solicitar a garantía dos dereitos lingüísticos por parte da Consellaría de Sanidade. Este escrito pódese descargar tamén na páxina web da Mesa:

-    http://www.amesanl.org/campanhas/reclamacion_centrosmedicos_individual_galego.doc 

-    http://www.amesanl.org/campanhas/reclamacion_centrosmedicos_individual_galego.pdf

Comentarios (3)

1 LOIS DE SILÁN A Mesa, coma outros galegoexterminadores, sectoriza os usos lingüísticos do galego na Galiza. Os usos lingüísticos non son sectorizábeis!: na Galiza na súa lingua territorial propia coma en Castela na súa coma en ... na súa; sen prexuízo de usarmos linguas alleas (nomeadamente o castelán cos outros españois) con quen lexitimamente descoñeza a propia do territorio. Por outra banda, no caso de sectorizaren os usos do galego na Galiza o primeiro sector obxectivo das valentías normalizadoras da Mesa debera ser o do PODER XUDICIAL, empezando polo Tribunal Constitucional! Mais, as valentías cos xulgadores aínda as teñen os da Mesa e outros galegoexterminadores inconscientes no conxelador. Maio 11, 2008 2 Gallego de La Coruna Para muchos gallegos la lengua española NO es una lengua ajena a nuestra tierra. Recuerdo a Lois de Silán que el castellano es una lengua cooficial en Galicia y por lo tanto NO sólo sirve para utuilizarla cuando hablamos con alguien que no conozca el gallego. Maio 11, 2008 3 Lois O meu médico, por que eu lle falo en galego, él tamén o fai. Levámonos ben Maio 12, 2008

Escribir comentario

Nome

Comentario

Novo Comentario

Compartir: