Un dos catro maxistrados da Sala do Penal da Audiencia Nacional, que onte decidiu rexeitar o procesamento de tres militares de EE.UU. presuntamente implicados na morte do cámara español Xosé Couso en 2003 en Bagdad (Iraq), emitiu un voto particular discrepante no que estima que o ataque das tropas americanas contra o hotel no que se atopaban os xornalistas foi "indiscriminado", "desproporcionado" e "intencional".

Nese senso, o xuíz cita unha serie de principios recollidos "tanto no Protocolo I coma no dereito internacional" nos que se especifica "a prohibición dos ataques indiscriminados", referíndose aos "que non están dirixidos contra un obxectivo militar concreto".

O voto particular deste maxistrado indica que "no presente caso se aprecia un ataque intencional, indiscriminado e desproporcionado, contra obxectivos civís, con persoas civís ás que se lles causou a morte, utilizando medios de combate con grande capacidade mortífera, sen que se adoptasen as precaucións necesarias".

Este maxistrado discrepante conclúe que existen elementos abondos para manter o auto de procesamento ditado polo xuíz instrutor da causa, Santiago Pedraz, quen imputou a tres militares, o sarxento Thomas Gibson, e os seus superiores, o tenente coronel Philip de Camp e o capitán Philip Wolford por un presunto delicto de asasinato con aleivosía e outro contra a comunidade internacional, que pode ser castigado, este último, cunha pena de prisión de entre 10 e 15 anos.

Comentarios (0)

Escribir comentario

Nome

Comentario

Novo Comentario

Compartir: