A banda terrorista asasinou hoxe no País Vasco a un garda civil e feriu a outros catro, nun atentado con coche bomba contra a casa cuartel de Legutiano. Segundo as primeiras investigacións, o método usado polos terroristas foi similar ao atentado de Durango do pasado 2 de setembro contra outra casa cuartel: chegaron ao lugar, baixáronse do vehículo e deixaron o coche cos explosivos, activárono e fuxiron noutro, atopado en Abadiño.

O vehículo foi examinado pola policía ante a posibilidade de que contivese algún tipo de bomba-trampa. Os artificieiros descubriron que no seu interior había un dispositivo incendiario que non chegou a estourar.

O lugar onde foi localizado indica que os terroristas fuxiron de Legutiano a través do porto de Urkiola, xa que Legutiano e Abadiño atópanse en cada un dos extremos do porto.

A potente explosión provocou danos na parte central do edificio principal, en fiestras e tellado, así como nos chalés que se atopan á outra beira da estrada. O pequeno edificio anexo de vixilancia quedou reducido a cascallos. Era alí onde estaba o axente asasinado.

A vítima mortal é Juan Manuel Piñuel Villalón, nacido o 20 de xaneiro de 1967 en Melilla, estaba casado e tiña un fillo, segundo confirmaron fontes da loita antiterrorista. Os feridos están fóra de perigo.

Comentarios (0)

Escribir comentario

Nome

Comentario

Novo Comentario

Compartir: