Ceivar chama à mobilizaçom

Esta manhá celebrou-se no Centro Social O Pichel, em Compostela, umha rolda de imprensa convocada polo Organismo Popular Anti-repressivo Ceivar para informar sobre o próximo julgamento na Audiência Nacional de Ugio Camanho e Giana Rodrigues, e da campanha divulgativa e de denúncia que se está a desenvolver.

Joám Peres, responsável nacional de organizaçom de Ceivar, informou de que o juízo, que se vai desenvolver na Sala do Penal da Audiência Nacional que preside Javier Gómez Bermúdez, vai-se celebrar os vindeiros dias 3 e 4 de Novembro. As petiçons fiscais por dous presuntos delitos de "estragos terroristas’ e de ‘manipulaçom ilegítima de veículo’ ascendem a 19 anos de prisom, aos que haveria que sumar dous anos mais no caso de Ugio Camanho por presunta ‘falsificaçom de documentaçom’.

Ambos militantes levam em prisom preventiva desde o 26 de Julho de 2005. Actualmente Ugio Camanho está encarcerado em Puerto de Santa María (Cádiz) e Giana Gomes em Brieva (Ávila). Joám Peres aproveitou para lembrar que a dispersom é um castigo anhadido “nom só para as pessoas presas senom também para o seu contorno social” que se ve obrigado a se deslocar centos e mesmo miles de quilómetros cada fim-de-semana para visitas que nom superam os 45 minutos de duraçom.

A esta denúncia sumou-se também a qualificaçom de “tribunal excepcional” para a Audiência Nacional, herdeira do franquista Tribunal de Ordem Público, para o julgamento de delitos políticos, enquadrando o ámbito judicial como umha vertente mais da “ofensiva espanholista” de criminalizaçom do independentismo galego.

Ademais, o responsável de Ceivar informou da campanha que está a desenvolver o organismo através da celebraçom de assembleias informativas nas que estám a participar mais de 200 pessoas em toda a Galiza e que organiza o trabalho divulgativo e de denúncia, tendente especialmente a informar da convocatória de umha viagem a Madrid nos dias 2 e 4 de Novembro para expressar o apoio solidário às duas pessoas que vam ser julgadas e celebrar umha concentraçom prévia ao juízo.

Comentarios (1) add comment