MundoGaliza

A voceira de Cultura do grupo parlamentar do BNG, Ana Pontón, lamenta que nas súas primeiras declaracións, o novo Conselleiro de Cultura, Roberto Varela, amose “o seu desprezo polos creadores e creadoras galegos e por todo aquelo que constitúe unha expresión da cultura propia e un sector económico que precisa de impulso”. A deputada do BNG amosa o seu descontento coas manifestacións de Varela nas que indicaba que “a cultura galega limita” e subliña que isto revela unha “minusvaloración do propio e un profundo descoñecemento da realidade galega”.

Neste sentido, a portavoz de Cultura lembra que o novo titular desta carteira leva moitos anos vivindo fóra do país e agarda que “rectifique en datas próximas, cando teña un coñecemento máis polo miúdo dos sectores culturais galegos e do traballo que se ten feito no país”.

Ana Pontón lémbralle a Roberto Varela que non vén a exercer a Galiza de Ministro de Cultura, senón de Conselleiro do goberno galego e, por isto, apuntou que o artigo 32 do Estatuto de Autonomía de Galiza indica que é labor da Xunta “a defensa e promoción dos valores culturais do pobo galego”.