Compartir Twitter Myspace Chuza Digg Del.icio.us Yahoo Technorati Googlize this Facebook Wikio Meneame Imprimir E-mail

A Academia Galega do Audivisual (AGA) deu a coñecer os candidatos que optarán aos premios Mestre Mateo 2006, entre os que destacan as 15 nominacións "dun franco, 14 pesetas', de Carlos Iglesias, e as nove do filme de animación 'De profundis', de Miguel Anxo Prado.

En rolda de prensa, a presidenta da AGA, María Bouzas, acompañada polo asesor xurídico da asociación, abriu os sobres co nome dos preseleccionados nas 25 categorías. Agora os académicos teñen até o 14 de marzo para elixir, de entre os candidatos, os gañadores.

Así, 'Un franco, 14 pesetas' e 'De profundis' competirán polo premio á mellor longametraxe con 'Mia Sarah', de Gustavo Ron, e 'De Bares', de Mario Iglesias. Os directores destas catro obras, agás 'Mia Sarah', optan tamén a mellor dirección, xunto coa responsable do programa televisivo 'A casa de 1906', Sonia Barros.

Na categoría de mellor guión repiten Miguel Anxo Prado, Carlos Iglesias e Mario Iglesias, que ademais de dirixir, tamén escribiron os textos de 'De profundis', 'Un franco, 14 pesetas', e 'De bares'. A eles súmanse os guionistas de 'A Casa de 1906', Xosé Morais e a propia directora, Sonia Barros.

Ademais, Carlos Iglesias, que tamén protagonizou o seu filme, é candidato a mellor interpretación masculina principal, xunto con Daniel Brühl e Luis Tosar por 'Cargo' e Evaristo Calvo polo telefilme 'A biblioteca da iguana'.

En canto ás candidatas a mellor actriz protagonista, producirase un dobre entre Belén Constela e Mela Casal polo seu papel na serie televisiva 'A vida por diante', e Isabel Blanco e Nieves de Medina por 'Un franco, 14 pesetas'.