Compartir Chuza Meneame Fresqui Digg Del.icio.us Yahoo Technorati Imprimir E-mail

A aerolínea de baixo custo Vueling anunciou que ofertará 6.000 prazas a 10 euros cara a calquera dos seus destinos dende a capital galega, coa posibilidade de realizar reservas até marzo de 2008. Deste xeito, celebra que alcanzou os 250.000 pasaxeiros nos seus servizos desde o aeroporto santiagués de Lavacolla.

Confirmouno o director internacional de Mercadotecnia de Vueling, Alfons Claver, na rolda de prensa dada na terminal de Lavacolla para celebrar o pasaxeiro 250.000, que foi unha veciña de Porto do Son, Lorena Oujo, de 23 anos de idade e que reside en Barcelona, onde estuda Fisioterapia. A moza recibiu como agasallo un voo gratuíto, para ela e un acompañante, a calquera destino Vueling dende Santiago.

Claver destacou que a conmemoración do pasaxeiro 250.000 "confirma o éxito" que tivo na Galiza a fórmula de nova xeración de Vueling, que combina "prezos competitivos e excelentes níveis de servizo".

Subliñou que esta empresa se converteu na segunda aerolínea por volume de pasaxeiros no aeroporto de Santiago, e transportou durante o pasado mes de xullo a máis de 28.000 viaxeiros, o que para a organización expresa "a excelente acollida de Vueling entre o público galego".